Afghansk familie har søkt tilflukt i Hønefoss kyrkje
Den afghanske familien som blei henta av politiet i eit bedehus i Fitjar, har no søkt tilflukt og kyrkjeasyl i Hønefoss kyrkje.
- Når menneske fryktar for livet, så må ein stole på dei, og berre ta det derfrå, seier sokneprest Tor Magnus Amble til NRK.
Etter arrestasjonen i «Betania», frikyrkjelyden Nytt Livs bygg på Fitjar i Hordaland i slutten av februar, har utsendinga av familien blitt stoppa fleire gonger. Så seint som fredag avgjorde Borgarting lagmannsrett at familien ikkje får bli i landet mens anken på avslaget om opphaldsløyve blir behandla.
Familien skulle etter planen sendast ut sist laurdag, men ifølgje NRK stoppa politiet utsendinga. Familien blei då pålagt å halde seg på Hvalsmoen transittmottak i Buskerud inntil vidare.
Utlendingseininga i Politiet vil ikkje uttale seg om saka, men kommunikasjonsrådgivar Ellen Cecilie Eriksen skriv i ein e-post til NRK at dei er gjort kjent med at familien ikkje lenger oppheld seg på Hvalsmoen transittmottak.
(©NPK)
Ein afghansk familie har no søkt kyrkjeasyl i Hønefoss kyrkje. Foto: Cornelius Poppe / NTB scanpix