Ap: - Listhaug trenerer saka om oktoberbarna

Innvandringsminister Sylvi Listhaug (Frp) brukar alle moglegheiter til å trenere saka om oktoberbarna, meiner Stein Erik Lauvås i Arbeidarpartiet.

- Listhaug prøver å orme seg unna dette, sa Lauvås, som er innvandringspolitisk talsperson for Ap, til NRKs Dagsnytt 18 fredag.

- Ho er farleg nær ved å få ei treneringssak mot seg, seier han.

Striden står om brevet som Listhaug måndag sende til partia på Stortinget med 26 spørsmål om korleis vedtaket om å behandle asylsøknadene til einslege mindreårige asylsøkjarar frå Afghanistan på nytt skal gjennomførast. Dei ville elles ha måtta forlate Noreg når dei fyller 18 år.

Stortinget fatta vedtaket 14. november, og statsråden brukte altså over fire veker på å skrive brevet. Opposisjonen har allereie gjort det klart at dei ikkje kjem til å svare på spørsmåla.

Listhaug har ikkje noko anna val enn å gjennomføre vedtaket, meiner Lauvås, som meiner det er opp til statsråden å finne ut av korleis vedtaket skal setjast i verk og eventuelt komme tilbake til Stortinget med ei sak.

- Ho har fått Stortinget mot seg og har manøvrert seg inn i eit hjørne. Ho vil eigentleg ikkje gjennomføre vedtaket, som ho jo er dundrande ueinig i. Derfor prøver ho no å komme seg unna og trenere dette gjennom å sende eit høgst uvanleg brev til Stortinget, seier han.

- Dette er eit forsøk på å få Stortinget til å drive ei saksbehandling som det er Listhaugs eige departement som skal gjere, seier Lauvås.

Listhaug held på si side fast på at det einaste ho er ute etter, er å gjennomføre vedtaket i tråd med Stortingets ønsker.

- Derfor har eg tatt ein ekstra runde med dette brevet, seier Listhaug, som meiner det vil ta lenger tid å komme tilbake til Stortinget med ei sak.

(©NPK)

Innvandrings- og integreringsminister Sylvi Listhaug (Frp) prøver å trenere vedtaket om å behandle asylsøknadene til dei såkalla oktoberbarna på nytt, hevdar innvandringspolitisk talsperson i Ap, Stein Erik Lauvås. Foto: Ole Berg-Rusten / NTB scanpix