Arsenal opnar ikkje lommeboka for arvtakaren til Wenger

Kven som overtar som manager i Arsenal er framleis uvisst, men han får uansett ikkje mykje å rutte med i overgangsvindauget.

Etter to år med tunge investeringar i troppen lukkar Arsenal lommeboka og gøymer gullkortet. Det siste året har Arsenal brukt nærmare 115 millionar pund på Alexandre Lacazette og Pierre-Emerick Aubameyang.

Men den som overtar etter franskmannen vil likevel ikkje stå tomhendt å sjå på kjøpefesten i overgangsvindauget. Ifølgje den britiske Daily Mail vil den nye manageren få 50 millionar pund å handle for.

Fredag annonserte klubben at Arsène Wenger gir seg som manager etter denne sesongen.

Luis Enrique (klubblaus) er av mange spådd som favoritt til å overta, men også sterke namn som Joachim Löw (Tyskland), Max Allegri (Juventus), Maurizio Sarri (Napoli), Maurizio Sarri (Napoli), Brendan Rodgers (Celtic) og Carlo Ancelotti (klubblaus) er nemnt som moglege arvtakarar.

Enrique skal visstnok ha gjort det klart at han kunne tenkje seg jobben som ny manager i Arsenal, og skal vere det føretrekte valet til sportsdirektør Raul Sanllehi. Sanllehi og Enrique jobba saman i Barcelona.

Men uansett kven som tar over, så må han styre på «sparebluss».

(©NPK)

Luis Enrique med fortid i Barcelona er av mange rekna som favoritt til å ta over etter Arsène Wenger. Foto: AP Photo/Manu Fernandez/NTB scanpix.

Annonse
Annonse