Børsfall heile onsdag
Hovudindeksen på Oslo Børs starta onsdagen med fall og heldt fram nedover til stengjetid. Då hadde indeksen svekt seg 0,46 prosent til 880,91 poeng.
Enden på visa blei ein børsdag i raudt - slik det gjerne må bli når aksjekursane til dei største og mest omsette selskapa på hovudindeksen fell. Equinor, som var mest omsett, enda ned 0,4 prosent. DNB (-1,0), Marine Harvest (-1,2) og Telenor (-0,3) følgde på omsetningstoppen.
Blant taparane onsdag var flyselskapet Norwegian, som midt i ein liten ryktestorm rundt moglege oppkjøpsinteressentar, fall 4,7 prosent i verdi. Berre IDEX gjorde det dårlegare på indeksen, med eit kursfall på 4,8 prosent.
På dei leiande børsane i Europa var biletet noko blanda. CAC 40 i Paris var ned 0,3 prosent, mens DAX 30 i Frankfurt og FTSE 100 i London enda opp høvesvis 0,1 og 0,3 prosent.
Prisen for eit fat nordsjøolje held seg stabil godt oppe på 70-talet, og blei onsdag ettermiddag omsett for rundt 74,50 dollar fatet på spotmarknaden., Amerikansk lettolje gjekk for drygt 63 dollar fatet.
(©NPK)
Illustrasjonsfoto: Gorm Kallestad / NTB scanpix
