CAS startar behandlinga av russiske OL-ankar

Måndag behandlar Idrettens valdgiftsrett (CAS) dei første ankesakene om IOCs avgjerd om å stengje ute russiske utøvarar frå OL på livstid.

Totalt har CAS fått 42 ankar frå russiske utøvarar som er utestengde av Den internasjonale olympiske komiteen (IOC). Utøvarane kjem frå idrettane langrenn, skøyter, skeleton, bob og ishockey.

Alle dei involverte russarane avviser på det mest bestemte at dei har vore involverte i det russiske dopingprogrammet.

Til grunn for avsløringane om russisk dopingbruk ligg funna i den mykje omtalte McLaren-rapporten og vitneutsegn frå dopingvarslaren Grigorij Rodtsjenkov.

Både Rodtsjenkov, som tidlegare var sjef for det russiske antidopinglaboratoriet i Moskva, og Richard McLaren skal vitne i ankesakene i CAS. Dei vil delta på telefon eller via videolink, opplyste valdgiftsretten nyleg.

Rodtsjenkov flykta til USA og oppheld seg på hemmeleg adresse etter at han fortalde det han visste om dopingprogrammet i heimlandet.

Det er venta at CAS vil kome med si avgjerd i ankesakene før OL i Pyeongchang blir innleidd tidleg i februar.

(©NPK)

Aleksandr Legkov er éin av fleire russiske utøvarar som har anka OL-utestenginga til CAS. Foto: Terje Bendiksby / NTB scanpix