Casper Ruud suste vidare til hovudrunden i Roland Garros
Casper Ruud er vidare til Roland Garros-turneringa etter å ha slått franske Alexandre Muller 6-1, 6-3 i den siste kvalifiseringskampen fredag.
Alexandre Muller vart fullstendig overkøyrd i det første settet og Ruud vann greitt med 6-1. Det andre vart noko jamnare, men den norske 19-åringen verka å ha full kontroll fram til 6-3.
- Det er ikkje så mange som har klart det tidlegare. Det er gøy, og dette har vore ein stort mål for meg denne sesongen. Det kjennest veldig fortent. Eg følte eg hadde god kontroll, sa Casper Ruud til Eurosport.
Dermed gjentok han bedrifta faren Christian Ruud og Jan Frode Andersen gjorde i Paris i 2001. Då tok begge seg vidare til hovudturneringa.
- Vi er veldig fornøgde no. Det er kjempestort, og han har drøymt om dette, sa trenaren Christian Ruud.
1. runde i Grand Slam-turneringa går frå søndag, og dei kvalifiserte spelarane kjem inn i tablået. Ruud kan møte spelarar ranka frå 95 til topp 20.
Den tidlegare verdseinaren Novak Djokovic er ein spelar Ruud kan møte.
(©NPK)
Casper Ruud er klar for hovudtablået i Roland Garros-turneringa i tennis. Foto: Lars Eide / NTB scanpix
