De Gendt gjekk solo til Catalunya-seier
Thomas De Gendt heldt unna for forfølgjarane med eit naudskrik og vann den tredje etappen av sykkelrittet Vuelta a Catalonia.
Den belgiske Lotto Soudal-ryttaren Thomas De Gendt sat i brot onsdag. Lenge såg utbrytarane ut til å bli henta inn relativt tidleg, men då rutinerte De Gendt gjekk solo auka avstanden på ny.
Med 17 kilometer igjen til mål hadde belgiaren to og eit halvt minutt leiing på det jaktande hovudfeltet. To kilometer før mål var han framleis åleine i tet, og De Gendt heldt unna sjølv om forfølgjarane blei nærgåande til slutt.
Lotto-Soudal-stjerna overtok samanlagtleiinga i rittet med sigeren og sikra seg også klatretrøya.
Ei rekke syklistar måtte i asfalten i ein velt mot slutten. Den australske stjerna Adam Yates var blant dei det gjekk hardast utover.
Etappen onsdag blei korta ned betrakteleg som følgje av dårlege vêrmeldingar. Ryttarane skulle i utgangspunktet over ei rekke fjell, og målgangen var i utgangspunktet lagt til skistaden Vallter på 2100 meters høgde over havet.
Av frykt for snøskred blei derimot lengda på etappen redusert med 46 kilometer. I staden blei målgangen lagt til Camprodon på 950 meters høgde.
(©NPK)
