Dronning Margrethe har akseptert prins Henriks ønske om separat gravstad
Det vakte oppsikt då prins Henrik gav beskjed om at han ikkje ville bli gravlagt ved sida av kona si. No seier dronning Margrethe at ho aksepterer ønsket hans.
- Han var jo eit fritt menneske, og det var hans avgjerd. Det aksepterte eg jo, sa dronning Margrethe på ein pressekonferanse på Château de Cayx sørvest i Frankrike torsdag.
Pressekonferansen blei halden i samband med at Frankrikes president Emmanuel Macron skal besøkje Danmark om knapt to veker, men ettersom det er første gong dronninga møtte pressen etter prinsens død, kom også spørsmålet om gravstaden opp.
Prins Henrik, som opphavleg var fransk, døydde 13. februar i år. Eit halvt år tidlegare blei det kjent at prinsen ikkje ville bli gravlagd ved sida av dronninga i Roskilde domkyrkje, slik tradisjonen er. Som grunn oppgav han misnøye med at han ikkje var likestilt med kona.
I staden ønskte han å bli kremert, slik at halvparten av oska kunne spreiast på sjøen i Danmark og den andre halvparten setjast ned i ei urne i den private hagen i Fredensborg Slotshave.
Ifølgje dronninga er oska enno ikkje spreidd.
- Det kjem til å skje, men vi har ikkje gjort alt, seier dronninga.
(©NPK)
Dronning Margrethe av Danmark møtte torsdag pressa på Chateau de Caix ved Cahors sørvest i Frankrike. Det er første gong ho snakkar om ektemannens død og livet etter prins Henrik døydde 13. februar. Foto: Fred Lancelot / AP / NTB scanpix
