DSS: Ingen innloggingar då Sandbergs telefon var i Iran

Det er ikkje registrert forsøk på innloggingar i regjeringas saksbehandlingssystem i perioden Per Sandberg og tenestetelefonen hans var i Iran.

Undersøkingane til Service- og tryggingsorganisasjonen til departementa (DSS) viser at det ikkje er registrert forsøk på å logge seg inn i saksbehandlingssystemet mens Sandberg var på ferie i Iran saman med kjærasten Bahareh Letnes.

Det kjem fram i eit svar statsminister Erna Solberg (H) har gitt på spørsmål frå Une Bastholm i Miljøpartiet Dei Grøne (MDG) om kva kunnskap Solberg hadde om Sandbergs forhold til Letnes og Iran.

Sandberg måtte trekke seg som fiskeriminister då det etter kvart kom fram svært belastande informasjon om brot på sikkerheitsrutinane i regjeringa. Han har spesielt blitt kritisert for å ha hatt med seg tenestetelefonen til Iran - utan å varsle statsministeren på førehand om verken reisa eller om at han hadde med seg telefonen.

(©NPK)

Ingen andre departement har hatt ein telefonpraksis på reiser i høgrisikoland som Fiskeridepartementet under Per Sandberg. Det kjem fram av undersøkingane statsminister Erna Solberg (H) har gjort etter at Sandberg-saka eksploderte. Foto: Heiko Junge / NTB scanpix

Annonse
Annonse