Elev varsla om datahol i Bergen
Det var ein elev ved ein barneskule i Bergen som oppdaga sikkerheitsholet som gjorde at informasjon om tusenvis av elevar og lærarar kunne ha blitt spreidd.
Ifølgje NRK var det også eleven som sende ein e-post i namnet til ein rektor, og der skal han ha latterleggjort sikkerheita i datasystemet til kommunen.
- Det ser ut til at ein skuleelev i Bergen har funne eit sikkerheitshol i persondatasystemet til kommunen og varsla om dette. Då varselet hans ikkje blei tatt tak i, valde han å logge seg på som administrasjonsbrukar for å sende ut eit signal, seier politiinspektør Frode Karlsen i Vest politidistrikt.
Eleven skal ha sendt varselet for eit halvt år sidan og gitt tydeleg beskjed til skulen. Han skal ha følgt ein mappestruktur i systemet og funne informasjon om brukarnamn og passord for elevar og tilsette. Ifølgje politiet er det ikkje grunn til å frykte at brukarinformasjon er kommen på avvegar.
Guten er under den kriminelle lågalder og blir ikkje sikta i saka.
Det var seint måndag kveld denne veka at Identum, selskapet som står bak den digitale løysinga eFeide som blir brukt av skulane i Bergen, oppdaga at nokon hadde komme seg inn i datasystemet på administratornivå. Der hadde vedkommande tilgang til å sjå og redigere personopplysningar frå til saman 35.000 brukarar.
(©NPK)
Illustrasjonsfoto: Berit Roald / NTB scanpix
