EU truar med gjengjelding dersom USA innfører «katastrofal» toll på bilar
EU har begynt å utarbeide ei liste med mottiltak som skal setjast i gang dersom USA gjer alvor av å innføre ein «katastrofal» biltoll, ifølgje EU-kommissær.
- Vi førebur ei liste med balanserande mottiltak. Verda har utvilsamt utfordringar når det gjeld global overkapasitet, men liknande tiltak på bilar vil vere katastrofalt, sa EUs handelskommissær Cecilia Malmström torsdag.
Overkapasiteten er ei tilvising til den store produksjonen av stål og aluminium, som president Donald Trump meiner har ført til at metall dumpast på den amerikanske marknaden.
USA innførte i mars 10 prosent toll på import av aluminium og 25 prosent toll på import av stål.
USAs president Donald Trump trua nyleg med ein kraftig auke på tollen på bilar som importerast til USA frå EU-landa, noko som har skapt uro særleg i Tyskland, som eksporterer hundretusenvis av bilar til USA kvart år.
Malmströms åtvaring kjem få dagar før EU-kommisjonens president Jean-Claude Juncker reiser til Washington for å prøve å overtyde Trump om å droppe tollplanane på bilar.
EU har tidlegare trua med å innføre toll på ei lang rekkje amerikanske industrivarer.
(©NPK)
