Fagforeiningar fryktar ny toppsjef i Air France-KLM
Fagorganiserte i Air France-KLM fryktar at den nye toppsjefen Benjamin Smith vil kutte lønningar og skape dårlegare arbeidsvilkår.
Flyselskapet opplyste torsdag at Smith, som tidlegare har sete i toppleiinga i Air Canada, blir ny administrerande direktør.
Vincent Salles frå fagforeininga CGT-Air France seier til radiostasjonen France Info at han er bekymra for at Smith vil sette i verk endringar som gir lågare lønningar og dårlegare arbeidskår.
Dei fagorganiserte reagerer også på at Smith blir den første utanlandske toppsjefen for det franske nasjonale flyselskapet Air France. Ni fagorganisasjonar har protestert mot valet av ein utlending.
Selskapets førre toppsjef, Jean-Marc Janaillac, gjekk av i mai etter at Air France-tilsette hadde streika i 13 dagar med krav om høgare lønn.
(©NPK)
Benjamin Smith på eit bilde frå 2012. Foto: Aaron Vincent Elkaim / The Canadian Press / AP / NTB scanpix
