FN ber Iran oppheva dødsdom
To FN-representantar ber Iran om ikkje å avretta ein mann som er dømd til døden for eit drap han gjorde som 15-åring.
Internasjonale standardar tillèt ikkje avretting av personar som var under 18 då brotsverket blei gjort, strekar Agnes Callamard, FNs spesialrapportør for utanomrettslege, summariske og tilfeldige avrettingar under, og Renate Winter, som leier FN-komiteen for barns rettar.
I ei utsegn skriv dei at dei har informasjon som tyder på at Mohammad Kalhori kan bli avretta om kort tid. Han er dømd til døden for å ha drepe ein lærer då han var 15 år gammal.
(©NPK)
