Gangnes-comeback i september

Den norske landslagshopparen Kenneth Gangnes (29) gjer comeback i hoppbakken om få veker.

Etter fleire månader med trening etter sin fjerde korsbandskade i november er 29-åringen snart tilbake.

- Dei seier at ein bør minst vente i ni månader, og i morgon har det gått ni månader. Eg er veldig nær å kunne hoppe igjen, seier Gangnes til Nettavisen.

29-åringen ser for seg sine første svev i bakken om få veker.

- Eg hadde sett for meg rundt månadsskifte, men eg trur kanskje eg dryger det litt til. Eg tippar det blir starten av september, seier Gangnes.

I sommar fortalde Gangnes til NTB at kneet var i rute til comeback vinter.

- Held han seg frisk, trur eg vi får sjå han på pallen til vinteren, sa landslagssjef Alexander Stöckl den gong.

Sjølv drøymer Gangnes om VM-suksess i Seefeld/Innsbruck i februar.

- Du må ha nokre drøymer. Skjer det, skjer det. Skjer det ikkje, håper eg at eg har fighta om det. Eg vil verkeleg ha med meg medalje frå VM, og enkeltrenn står jo øvst på lista over mål i comebacket, sa Gangnes i juli.

(©NPK)

Skihopparen Kenneth Gangnes er ikkje langt unna comeback i hoppbakken. I november røyk han korsbandet for fjerde gong. Foto: Terje Bendiksby / NTB scanpix