Giske-saka har ikkje påverka veljarane
Giske-saka har lita betyding for folk når dei skal avgjere om dei vil stemme på Ap, viser ei undersøking.
Undersøkinga er gjort av Sentio på vegner av P4 Nyhetene. Heile 70 prosent av dei spurde svarte at varsla mot Trond Giske ikkje har betyding for om dei vil stemme Ap.
Samtidig svarer 20 prosent at saka har gjort at dei ikkje vil stemme på partiet.
Valforskar og professor ved Universitetet i Oslo, Bernt Aardal, seier dette viser at slike saker fort blir gløymde.
- I den grad det får ein negativ effekt, så er det vanleg at det ikkje er så veldig langvarig, seier Aardal.
Undersøkinga viser at 62 prosent av unge i alderen 18 til 22 år meiner Giske-saka ikkje har noko å seie, mens 73 prosent i alderen 56 til 65 år svarar det same.
Giske trekte seg som nestleiar i Arbeidarpartiet 7. januar etter at det hadde komme fleire varsel om upassande oppførsel frå han overfor fleire kvinner. Samtidig trekte han seg frå rolla som leiar for Aps finansfraksjon på varig basis.
(©NPK)
Foto: Gorm Kallestad / NTB scanpix
