Hoelgaard beste norske i Arctic Race-opninga
Nederlandske Mathieu van der Poel vann 1. etappe av Arctic Race. Markus Hoelgaard stivna mot slutten og hamna akkurat utanfor pallen med fjerdeplass.
Hoelgaard blei beste norske ryttar på opningsetappen. Den gjekk over 184 kilometer frå Vadsø til Kirkenes.
- Det var blytungt. Eg var ganske køyrd allereie i botn av bakken, seier Hoelgaard til TV 2.
- Eg hadde trua ein periode, men visste at dei kom fort bakfrå. Det er litt bittert når det kunne vore betre, men eg er nøgd med ein fjerdeplass i dag, fortset Hoelgaard.
Bjørn Tore Hoem var involvert i ein velt like før spurten mot mål, skriv Procycling.no.
Anders Skaarseth var lenge med i eit brot og sikra nok poeng til å kunne sykle i klatretrøya på fredagens etappe frå Tana til Kjøllefjord (195 kilometer).
(©NPK)
Markus Hoelgaard blei beste norske ryttar under Arctic Race-opninga. Foto: Terje Pedersen / NTB scanpix
