HRW tar til orde for globalt forbod mot «drapsrobotar»

Human Rights Watch (HRW) oppfordrar landa, som skal delta på møtet frå 27. til 31. august, til å bli einige om å starte forhandlingar neste år.

Målet må vere å utarbeide ein avtale som vil stille krav til det organisasjonen kallar meiningsfull menneskeleg kontroll over våpensystem og bruk av makt.

Utvikling av våpensystem som opererer sjølvstendig og utan menneskeleg kontroll, produksjon av slike våpen og bruk av dei bør forbys, heiter det i den 46 sider lange rapporten Heed the Call: A Moral and Legal Imperative to Ban Killer Robots, som HRW la fram tysdag.

- Å tillate utvikling og bruk av drapsrobotar vil undergrave etablerte moralske og juridiske standardar, seier våpenforskar Bonnie Docherty i HRW, som samordnar prosjektet Campaign to Stop Killer Robots, der HRW og fleire andre organisasjonar deltar.

Samtalar om å underordne såkalla drapsrobotar, eller drapsdronar, under FNs våpenkonvensjon, vart formalisert i 2017, men utan at det er utarbeidd noko spesifikt mål.

Så langt har 26 land gitt si støtte til å forby slike autonome våpensystem. Over 20 fredsprisvinnarar og over 160 religiøse leiarar og organisasjonar krev forbod. I juni la Google fram eit etisk rammeverk som inkluderer forplikting om å ikkje utvikle kunstig intelligens til våpenbruk, og i fjor stod Tesla-sjef Elon Musk fram med ei åtvaring om at krigsteknologien i framtida kan springe frå menneskja, med mindre ein bremser den raske robotutviklinga.

(©NPK)