Iran lèt kvinner sjå VM-kamp

Iranske styresmakter lettar på jerngrepet og tillèt kvinner å sjå fotball offentleg.

Løyvet gjeld rett nok berre for VM-kampen til Iran mot Spania onsdag. Det fortel det iranske nyheitsbyrået ISNA.

Kvinner kan sjå kampen på storskjerm frå familietribunane inne på stadiona Azadi og Takhti i Teheran. Det er første gongen sidan den islamske revolusjonen i 1979 at kvinner får entra fotballstadionar i landet.

Det mellombelse løyvet inneber også at kvinner kan sjå Spania-kampen på andre offentlege stader.

- Viss alt går greitt, kan dette medføra at forbodet blir fjerna, seier den kvinnelege politikaren Tayebeh Siavoshi, som er medlem av den iranske nasjonalforsamlinga.

Trass forbodet tok mange kvinner til gatene for å feira 1-0-sigeren til Iran mot Marokko. Ifølgje augevitne tok nokre av seg hovudplagget og dansa med mannlege fans ut i seine nattetimar.

Iranske styresmakter har grunngjeve forbodet med at kvinner må vernast frå «vulgær atmosfære og frenetiske, mannlege supporterar». Under fotball-VM i Russland har iranske fans og kvinneaktivistar protestert med plakatar på tribunen. Det internasjonale fotballforbundet (Fifa) har uttrykkjeleg uttalt at det tillèt protestane.

(©NPK)

Kvinner blir nekta å vera til stades på sportsarrangement i Iran. No lettar landet på forbodet i samband med fotball-VM. Foto: Themba Hadebe / AP / NTB scanpix

Annonse
Annonse