Iran viste fram eigenprodusert kampfly
Iranske styresmakter har vist fram det dei seier er deira første eigenproduserte kampfly.
Iranske TV-bilde viser tysdag president Hassan Rouhani i cockpiten til det nye flyet, som har fått namnet Kowsar. Flyet vart presentert på ei våpenmesse for forsvarsindustrien i landet.
Ifølgje statlege medium er Kowsar eit fjerdegenerasjons kampfly som er "100 prosent» produsert i Iran. Det statlege nyheitsbyrået Tasnim melder at flyet har avansert avionikk og avanserte våpensystem.
Statleg TV, som melder at flyet allereie har vore gjennom testing, har vist bilde av flyet på ei rullebane. Innslaget viste likevel ikkje flyet mens det tok av, eller andre klipp av flyet i lufta.
(©NPK)
President Hassan Rouhani vinkar til dei to pilotane i flyet. Bildet er sendt ut av iranske styresmakter. Foto: AP / NTB scanpix
