Jacobsen slått ut i valet av utøvarrepresentantar i IOC

Astrid Uhrenholdt Jacobsen tapte mot Emma Terho og Kikkan Randall i valet om å bli utøvarrepresentantar i Den internasjonale olympiske komiteen (IOC).

Onsdag slo den amerikanske langrennsveteranen Randall saman med Jessica Diggins knockout på alle i OL-lagsprinten. Og i utøvarvalet av nye representantar i IOC slo ho Jacobsen med 30 stemmer.

Jacobsen var ein av seks kandidatar til dei to verva.

- Det er kjedeleg, men eg hadde sett det komme. Då Kikkan skulle vere ein konkurrent, tenkte eg at det skulle bli vanskeleg å slå henne, erkjenner Jacobsen overfor NRK.

Randall hadde akkurat avslutta vervet som utøvarrepresentant i langrenn i Det internasjonale skiforbundet (FIS).

- Langrennsløparane har sett meg i aksjon i utøvarkomiteen i FIS, så eg håpar eg kan halde fram på same måte og skape tovegskommunikasjon. Eg skal få fram standpunkta til utøvarane, men samtidig bidra til at utøvarane forstår meir av avgjerdene som blir tatt, seier Randall.

Av i alt 2.919 utøvarar i OL i Pyeongchang valde 2.448 å stemme. Den finske ishockeyspelaren Emma Terho fekk flest stemmer med sine 1.045, medan Kikkan Randall fekk 831. Dei to er valde for ein periode på åtte år.

(©NPK)

Astrid Uhrenholdt Jacobsen blir trøysta av Erik Røste etter gullmedaljen på stafetten. Torsdag tapte ho i valet om å bli utøvarepresentant i IOC. Foto: Lise Åserud / NTB scanpix