Johannes Høsflot Klæbo tok sin sjuande sprintsiger for sesongen
Johannes Høsflot Klæbo avslutta verdscupsesongen i sprint som han byrja. 21-åringen viste igjen konkurrentane ryggen i Falun fredag.
Klæbo var einsam norsk svale i finalen og kom åleine til mål etter å ha mørna konkurrentane gjennom heile finalen. Italienske Federico Pellegrino tok andreplassen, mens franske Lucas Chanavat blei nummer tre.
21 år gamle Klæbo, som tok eit overlegent OL-gull i sprint i Pyeongchang, har vore på pallen i alle sprintrenn i verdscupen denne sesongen. Kun to gonger har han måtte sjå seg slått.
Totalt står han med 11 verdscupsigrar denne vinteren.
Skar fall for eige grep
Sindre Bjørnestad Skar var einaste andre norske løpar i semifinalane. Då kampen om finaleplassane tilspissa seg i siste sving, fall han for eige grep. Skar prøvde å presse seg forbi svenske Karl-Johan Westberg, men på innsida av han var det ikkje plass.
Dermed hamna dei begge på hovudet i snøen og fekk finalemoglegheitene øydelagt.
- Eg trudde eg skulle komme meg forbi han, men det var min skuld at det blei sånn, sa Skar til NRK.
Aleksandr Bolsjunov var raskast i prologen framfor Klæbo, men for den sterke russaren var sprinten over i kvartfinalen.
Også for dei norske løparane blei det mannefall i kvartfinalane. Eirik Brandsdal, som vurderer å avslutte karrieren etter inneverande sesong, blei nest beste norske løpar på 12.-plass i prologen, men meir enn éin utslagsrunde blei det ikkje på Kjelsås-løparen.
God Sundby-start
Martin Johnsrud Sundby gjorde også ein god prolog og enda på 22.-plass. Dermed sikra Røa-løparen ein god start på minitouren i Falun, trass i at han kom til kort på oppløpet i kvartfinalen.
Exit blei det også for Emil Iversen.
Norskkoreanske Magnus Kim gjorde som i Drammen og sikra seg plass i kvartfinalane. Han hadde 23. beste tid, men rauk i kvartfinalane.
Niklas Dyrhaug, Didrik Tønseth, Hans Christer Holund og Sjur Røthe blei på si side utslått i kvalifiseringa. Nærmast å ta seg vidare var Dyrhaug, som kom eit snautt sekund for seint til å gå vidare. Tydal-løparen blei nummer 36.
(©NPK)
Johannes Høsflot Klæbo i aksjon i verdscupsprinten i Falun fredag. Foto: Uld Palm, TT / NTB scanpix
