Kan gå mot nei til samanslåingsavtale i Finnmark

Finnmark Arbeidarparti er splitta om dei vil seie ja eller nei til avtalen om samanslåing med Troms som vart forhandla fram i førre veke. 

I Ap er neivinden så sterk at han kan avgjere utfallet når saka kjem til fylkestinget, skriv VG.

- Dette er ei vanskeleg sak. Eg registrerer at folk som støttar avtalen som kom ut av meklinga, held seg i ro. Motstandarane mobiliserer sterkt. Det heller nok i favør av eit nei, seier ordførar i Porsanger, Aina Borch (Ap) til VG.

Arbeidarpartiet er det største partiet i fylkestinget og opptrer vanlegvis samla i større saker. Fylkesleiar Ingalill Olsen stadfestar overfor avisa at fylkestingsgruppa vil følgje det fylkesårsmøtet i partiet kjem fram til neste helg.

Borch tvilte seg fram til eit ja til avtalen, som vart mekla fram av Knut Storberget fredag i førre veke. Ho peiker på at eit nei vil gi kommunalminister Monica Mæland (H) og regjeringa anledning til å instruere samanslåinga.

12 av 19 ordførarar i Finnmark er negative til avtalen, blant dei flest Ap-ordførarar, ifølgje ei undersøking NRK Finnmark har gjennomført.

Leiar i Vadsø Ap, Wenche Pedersen, er krystallklar i sitt syn.

- Eit nei vil vere eit ufatteleg sterkt signal til sentralmakta om at dette ikkje er godt nok, sa Pedersen på NRKs Dagsnytt Atten torsdag.

Også tidlegare Ap-nestleiar Helga Pedersen, som er nyvalt leiar i Tana Arbeidarparti, er sterkt imot den framforhandle avtalen med Troms.

(©NPK)

Knut Storberget (i midten) leidde meklinga mellom Troms og Finnmark i striden om fylkessamanslåinga i førre veke. F.v.: Lise Svenning, fylkesordførar i Finnmark, Ragnhild Vassvik, Knut Storberget, fylkesrådsleiar i Troms, Willy Ørnebakk og, Stein Ovesen.
Foto: Heiko Junge / NTB scanpix

Annonse
Annonse