Kina ber USA og Nord-Korea om å vise velvilje
Kina har bedt USA og Nord-Korea om å vise velvilje etter at Donald Trump torsdag avlyste møtet med Kim Jong-un.
- Den nyleg betra situasjonen på halvøya har vore hardt tilkjempa, og den politiske prosessen som no går føre seg er ei sjeldan historisk moglegheit, sa Lu Kang, talsperson for Kinas utanriksdepartement på ein pressekonferanse fredag.
Dei to statsleiarane skulle etter planen møtast i Singapore 12. juni, men torsdag sende USAs president Donald Trump eit brev til Kim Jong-un der han avlyste møtet. Ein av grunnane til at Trump valde å avlyse møtet, var at Nord-Korea fleire gonger den siste tida skal ha brote løfte dei hadde gitt til USA, ifølgje ei høgtståande kjelde i Det kvite hus.
Avlysinga kom rett etter at Nord-Korea offentleggjorde at det einaste anlegget deira for atomprøvesprengingar var øydelagt.
Under pressekonferansen fredag sa Kang at han trur eit møte mellom Nord-Korea og USA kan spele ei viktig rolle for atomnedrustinga på Korea-halvøya.
- Under dei noverande omstenda håpar vi at både Nord-Korea og USA kan anerkjenne den nylege positive framgangen, vere tolmodige, vise velvilje, bevege seg i same retning og fortsette si forplikting til å jobbe for atomnedrustning på halvøya, sa Lu Kang.
(©NPK)
Nord-Korea sprengde torsdag det dei seier er det einaste anlegget for atomprøvesprengingar i landet. Ei gruppe utanlandske journalistar var til stades ved sprenginga. Foto: Yonhap / AP / NTB scanpix
