Komikar redda geiter på undergrunnsbanen i New York

Komikaren Jon Stewart hjelpte til med å redde to geiter som hadde forvilla seg inn på undergrunnsbanen i Brooklyn i New York.

Folk oppdaga dei to geitene på sporet mellom stasjonane Fort Hamilton og New Utrecht i morgontimane måndag.

- Vi fekk høyre at dei gomla på gras, seier Jon Weinstein i operatørselskapet Metropolitan Transportation Authority (MTA), til BBC.

Tilsette på eitt av t-banetoga klarte saman med politifolk å drive dei kvite og brune geitene inn på eit avsperra spor. Der vart dei bedøvde.

Tilfellet ville ha det til at komikar Jon Stewart, kjent som talkshow-vert for The Daily Show, og kona hans Tracey, var på rett stad til rett tid. Paret, som er kjente dyrevernsaktivistar, hjelpte til med å få frakta geitene til dyrevernsforeininga Farm Sanctuary i Watkins Glen lenger nord i delstaten.

Det er uvisst korleis geitene kom seg inn på sporet, som er gjerda inn, men ligg i eit ope landskap. Likevel finst det fleire slaktehus i nærleiken som har hatt rømmingar tidlegare, ifølgje BBC.

Viss det viser seg at dei to geitene er rømlingar som har stukke av frå slaktaren, kan dei no sjå fram til ei lysare framtid saman med andre gardsdyr hos dyrevernarane ved Fram Sanctuary. Geitene har allereie fått namna Billy og Willy.

(©NPK)

Komikar Jon Stewart og kona Tracey hjelpte til med å frakte bort dei forvilla geitene frå undergrunnsbanen i New York. Foto: AP / NTB scanpix

Annonse
Annonse