Kontrollkomiteen avsluttar Innovasjon Noreg-saka 

Næringsminister Torbjørn Røe Isaksen (H) innrømmer at det er læringspunkt i Innovasjon Noreg-saka. Det er godt nok for kontrollkomiteen, som avsluttar saka

Kontroll- og konstitusjonskomiteen avgjorde tysdag at saka ikkje treng noka vidare oppfølging, skriv Dagens Næringsliv.

«Det er ikke en ønsket situasjon, og det er naturlig at både vi som eier og styret ser nærmere på hva vi kan lære av de erfaringene som er gjort i denne saken», skreiv Isaksen i svarbrevet til kontrollkomiteen.

Ein samla komité meiner det dermed ikkje er grunn til å forfølge saka, men vil samtidig sende eit signal til statsråden om at han drar nytte av erfaringane når han handterer eigarskapssaker.

- Vi tar svara til orientering og understrekar det han sjølv seier i den siste delen av svaret om at her er det grunn til å sjå på rutinar på nytt og lære av det som har skjedd, seier komitéleiar Dag Terje Andersen (Ap).

Hans Fredrik Grøvan i KrF seier til NTB at det er positivt at Isaksen ser at bodskapen i samtalen med Dyb kunne oppfattast på ulike måtar.

Bråket rundt Innovasjon Noreg oppstod fordi daverande styreleiar Per Otto Dyb meinte at Isaksen prøvde å instruere han til å droppe vurderinga av tilsetjingsforholdet til administrerande direktør Anita Krohn Traaseth. Dyb valde å trekke seg fordi han opplevde at næringsministeren prøvde å gripe inn i prosessen.

Isaksen understreka i svarbrevet til kontrollkomiteen at han eksplisitt sa at utsegna ikkje var meint som instruks.

(©NPK)

Næringsminister Torbjørn Røe Isaksen, erkjenner at det er ting å lære etter Innovasjon Noreg-saka. Foto: Heiko Junge / NTB scanpix