Massiv kritikk av plan om å utvisa romfolk frå Italia
Italias innanriksminister Matteo Salvini vil ikkje la seg pressa til å stoppa planen sin om å registrera og utvisa romfolk.
EU-kommisjonen åtvara tysdag mot forslaget og minte om at det ikkje er lov å utvise EU-borgarar basert på etnisitet.
Også regjeringspartnarane i partiet Femstjernersrørsla reagerer sterkt. Visestatsminister og partileiar Luigi De Maio meiner ei folketeljing basert på etnisitet vil vera grunnlovsstridig.
Men Salvini nektar å la seg pressa. «Eg gir ikkje opp, eg går vidare!», skriv han på Facebook.
Den kontroversielle planen blei presentert av Salvini i eit TV-intervju måndag. Han sa han vil finna ut kor mange romfolk det er i Italia og gjorde det klart at han ønskjer å utvise utanlandske romfolk som ikkje har papira i orden.
- Dessverre må vi behalda italienske romfolk, for du kan ikkje utvisa dei, sa Salvini, som leier det sterkt høgreorienterte partiet Ligaen.
Italienske jødar meiner forslaget minner om korleis jødane blei behandla i Italia då fascistane styrte landet før og under andre verdskrigen. Fleire tusen av dei blei deporterte og massakrert i dei tyske dødsleirane til nazistane.
(©NPK)
Matteo Salvini får sterk kritikk for planen sin om å telja og utvisa romfolk frå andre EU-land. Foto: AP/NTB scanpix
