Mbappé sende Frankrike vidare

Kylian Mbappé (19) blei tidenes yngste franske målscorar i ein meisterskap då Frankrike slo Peru 1-0 og tok seg til cupspelet i fotball-VM.

Med torsdagens resultat blei samtidig peruanarane slått ut i det som var deira første VM-sluttspel på 36 år.

Frankrike sleit med å skape sjansar i store delar av den første halvtimen, men «Les Bleus» hadde noko på gang i opptakta til 1-0-scoringen. Då målet endeleg kom i det 34. minutt, var det av den svært enkle sorten for Mbappé. På ope mål kunne han berre trille inn Olivier Girouds lobb.

På veg ut av eige forsvar blei Peru brutalt straffa. Paul Pogba braut og fann deretter Giroud, som skaut ballen via Alberto Rodríguez og i ein boge over keeper Pedro Gallese. På blank kasse sprang Mbappé inn scoringa som sørgde for fransk fotballhistorie.

Ungguten er no Frankrikes yngste målscorar i ein meisterskap (19 år og 183 dagar). David Trezeguet hadde den gamle rekorden då han scora i 1998-VM på heimebane i ein alder av 20 år og 246 dagar.

Trefte aluminiumen

Rett før 1-0-målet hadde Mbappé prøvd seg på ei kunstscoring, men med ryggen mot mål trefte ikkje PSG-stjerna skikkeleg med høgre hæl.

Peru var ikkje utan sjansar i Jekaterinburg, men som i opningskampen mot Danmark (0-1-tap) klarte ikkje søramerikanarane å omsetje dei i scoringar. I det 50. minutt var Pedro Aquino berre ein susar i krysstonga frå å gjere 1-1.

På stillinga 0-0 kom også Paolo Guerrero til ein kjempemoglegheit. Perus største stjerne blei spelt fri i boksen, men klarte ikkje å setje ballen i lengste hjørne. I staden parerte Hugo Lloris med beina i det som var den franske målvaktas 100. landskamp.

Det er første gong at ein keeper klarer den milepælen for Frankrike. Lilian Thuram har flest kampar for «Les Bleus» med sine 142.

Bra for Hareide

På tampen blei videodømming (VAR) brukt då dommaren delte ut gult kort til feil spelar. Édison Flores fekk først kortet, men det var Aquino som gjorde misferda. Etter ein beskjed på øyret frå videorommet gjorde kampleiaren om på avgjerda.

Frankrikes siger er også godt nytt for Åge Hareide og Danmark. I siste gruppekamp skal danskane møtte nettopp Didier Deschamps' franske stjernegalleri, og uavgjort der vil sende Hareide og co. vidare til åttedelsfinale. Samtidig vil det sikre Frankrike gruppesigeren.

Australias einaste moglegheit er å slå Peru og satse på fransk siger mot Danmark.

(©NPK)

Kylian Mbappé blei matchvinnar då Frankrike slo Peru 1-0 i VM torsdag. Sigeren sende franskmennene til åttedelsfinale. Foto: David Vincent / AP / NTB scanpix

Kylian Mbappé gjorde eitt av sine enklaste mål då Frankrike slo Peru 1-0 i VM. Foto: Vadim Ghirda / AP / NTB scanpix