Mexico hardt ut mot USAs grensepolitikk
Mexico kritiserer USA for å skilja barn frå foreldra på grensa og plassera dei i interneringsleirar.
Mexicanske styresmakter kallar politikken til president Donald Trump umenneskeleg.
- Eg vil på vegner av mexicanske styresmakter og det mexicanske folket uttrykkje ei kategorisk og kraftig fordømming av denne grufulle og umenneskelege politikken, seier utanriksminister Luis Videgaray.
- Vi ber den amerikanske regjeringa om å revurdera politikken og prioritere velferda og rettane til desse gutane og jentene, uavhengig av nasjonaliteten og immigrasjonsstatusen deira, held han fram.
Praksisen til Trump-regjeringa med å ta barna frå foreldre som blir skulda for å ha teke seg ulovleg over grensa frå Mexico, har ført til kraftig fordømming. 2.300 barn, over 100 av dei under fire år gamle, er sidan april plasserte i interneringsleirar på grunn av den såkalla nulltoleransepolitikken.
Måndag rykte fire tidlegare amerikanske førstedamer ut med skarp kritikk av politikken.
Fleirtalet av barna som er skilt frå foreldra, kjem frå Guatemala, El Salvador og Honduras.
(©NPK)
Mexicos utanriksminister Luis Videgaray rettar skarp kritikk mot USAs grensepolitikk. Foto: Moises Castillo / AP / NTB scanpix
