Nederland vil stille Russland til ansvar for MH17-nedskytinga
Nederland og Australia kjem til å stille Russland til ansvar for nedskytinga av Malaysia Airlines-flyging MH17 over Ukraina, opplyser Nederlands regjering.
I ei pressemelding frå regjeringa heiter det fredag at Nederland og Australia kjem til å «stille Russland til ansvar for sin del av nedskytinga».
Dei siste konklusjonane frå internasjonale etterforskarar peikar mot at «Russland er direkte involvert» i nedskytinga av passasjerflyet over Aust-Ukraina i 2014, meiner Nederlands utanriksminister Stef Blok.
Torsdag slo etterforskarar fast at raketten som skaut ned flyet, kom frå det russiske forsvarets 53. luftvernbrigade, stasjonert i Kursk i Russland.
Russland kritiserer konklusjonen og nektar for også endå ein gong å ha skote ned MH17. Russland skuldar ukrainske regjeringsstyrkar for å ha stått bak.
(©NPK)
Granskinga av MH17-katastrofen har gått føre seg i tre og eit halvt år. Arkivfoto: Mike Corder / AP / NTB scanpix
