Ødegaard klar for Vitesse

Real Madrid låner ut Martin Ødegaard til den nederlandske klubben Vitesse fram til neste sommar.

Det stadfestar Real Madrid på nettsidene sine tysdag. I ei kort melding skriv klubben at dei har vorte einige med den nederlandske klubben om ein avtale som strekkjer seg fram til 30. juni 2019.

Det har lenge vore klart at den spanske klubben kom til å låne ut nittenåringen, men det har vore uvisst til kven.

Tenåringsstjerna returnerte nyleg til Real Madrid etter halvtanna år på utlån til Heerenveen.

Fleire medium har dei siste dagane meldt at det stod mellom dei nederlandske klubbane Vitesse og Heerenveen, men Aston Villa og Derby i den engelske meisterskapsserien har òg vore nemnde som sannsynlege stoppestader for Ødegaard.

Vitesse har på si side jobba hardt for å sikre seg nordmannen den kommande sesongen. Nyleg sa sportsdirektør Marc van Hintum at det var ein tøff dragkamp på gang om Ødegaards signatur.

- Det er ikkje lett, for det er mange klubbar som er interesserte i han, men vi håper framleis at han kjem til Vitesse, sa van Hintum til storavisa De Telegraaf.

Vitesse-trenar Leonid Slutskij har òg uttalt seg om interessa for Ødegaard.

- Vi får sjå. Dersom han ikkje har signert ein kontrakt, så er det ikkje offisielt. Eg håper at det blir offisielt, sa russaren til Fox Sports nyleg.

No er altså avtalen på plass.

(©NPK)

Martin Ødegaard blir lånt ut til Vitesse. Foto: Berit Roald / NTB scanpix

Annonse
Annonse