Oljefondet har tapt 2,9 milliardar på Facebook-skandalen
Oljefondet, som eig 0,71 prosent av Facebook, har blitt råka hardt av Facebook-skandalen og har dei tre siste dagane tapt 2,9 milliardar kroner.
I helga blei det avslørt at Facebook delte brukardata frå 50 millionar personar til det britiske analyseselskapet Cambridge Analytica (CA). Selskapet skal seinare ha brukt dataa til å hjelpe Donald Trump til å bli valt som president i USA.
Skandaleavsløringane har ført til at Facebook har rast 10 prosent på børsen på få dagar.
Dette rammer også Statens pensjonsfond utland, betre kjent som oljefondet, som eig 0,71 prosent av Facebook.
Dei tre siste dagane har aksjeposten til oljefondet blitt redusert frå 29,4 milliardar kroner til 26,5 milliardar kroner.
Kommunikasjonssjef Thomas Sevang i oljefondet ønskjer ikkje å kommentere investeringa.
- Vi er ein langsiktig aksjonær, men vi kommenterer ikkje enkeltinvesteringar, seier Sevang til Nettavisen.
(©NPK)
Også Norges Oljefond blir råka av Facebook-skandalen, ettersom Facebook-aksjane stuper og oljefondet eig 0,71 prosent av det sosiale nettverket. Foto: Thibault Camus / AP Photo / NTB scanpix
