Opec diskuterer auka oljeproduksjon
Oljeministrane i Opec-landa sit no samla i Wien for å diskutere eit forslag om å auke produksjonen med 1 million fat om dagen.
Oljeprisen har stige dei siste månadane, noko som har fått oljeproduserande land til å vurdere produksjonsauke.
Dei 14 Opec-landa, der Saudi-Arabia er det dominerande, og ei russiskleidd gruppe med ti andre land, planlegg no å opne kranane og auke produksjonen med rundt 1 prosent, opplyste Russlands energiminister Aleksandr Novak torsdag kveld.
Dei 24 landa pumpar no opp mindre olje enn dei vart einige om i 2016, noko som blant anna kjem av krisa i Venezuela og Libya.
USAs varsla sanksjonar mot Iran vil også truleg få følgjer for den samla oljeproduksjonen. Dersom det blir pumpa opp meir olje, vil iranarane venteleg misse marknadsdelar til erkerivalen Saudi-Arabia på grunn av sanksjonane.
OPECs oljeministrar vil truleg fatte eit vedtak laurdag.
(©NPK)
Ein oljebrønn i Venezuela. Foto: AP / NTB scanpix
