Oslo Børs enda veka med raude tal
Hovudindeksen på Oslo Børs gjekk ned med 0,60 prosent til 790,76 poeng på den siste handledagen i veka, tyngd av at alle børslokomotiva også sleit.
Dei fem største selskapa notert på hovudindeksen gjekk alle ned fredag. Verst gjekk det utover Yara International, som fall med 1,4 prosent, tett følgt av DNB med eit fall på 1,2 prosent. Deretter fall Telenor med 0,9 prosent, Norsk Hydro med 0,6 og Statoil med 0,2 prosent.
Mest omsett fredag var Marine Harvest, som også gjekk opp med 0,9 prosent.
Blant dei andre selskapa med god aktivitet i aksjen gjekk IT-selskapet Asetek opp med 9,4 prosent og Aker Solutions opp med 2,6 prosent. Colden Ocean Group steig med 2,3 prosent.
Reiarlaget Stolt-Nielsen sokk med 3,4 prosent og Sparebank 1 SR-Bank med 3,1 prosent.
Dei tonegivande aksjeindeksane i Europa gjekk også i raudt, bortsett frå FTSE 100 i London som steig med 0,3 prosent. DAX 30 i Frankfurt stod uendra, medan CAC 40 i Paris fall med 0,4 prosent.
Oljeprisen steig forsiktig fredag, og like etter børsslutt blei eit fat nordsjøolje omsett for 63,38 dollar fatet (opp 0,11 prosent), medan eit fat amerikansk lettolje låg på 57,32 dollar (opp 0,28 prosent).
(©NPK)
Foto: Terje Pedersen / NTB scanpix
