Over éin million såg OL-kvinnestafetten

Marit Bjørgen og co. blei følgt av 1,2 millionar sjåarar på det meste, og i snitt hadde sendingane éin million sjåarar. Herrestafetten gjekk hakket tidlegare på morgonen søndag, men blei følgt av éin million på det meste. 785.000 blei snittet for sendinga.

1.063.000 følgde 15 kilometer i skiskyting for herrar, medan 787.000 følgde kvinnenes 12,5 km.

- I dag må vi nesten låne sportsfolkets nye favorittuttrykk: Dette er heilt rått. Tala på damestafetten og 15 kilometer skiskyting er blant dei høgste vi har hatt på tradisjonell TV nokon gong. Berre éin gong før har vi sett høgare sjåartal. I tillegg følgde veldig mange OL-sendingane digitalt, seier Espen Skoland, kommunikasjonsdirektør i TVNorge og Discovery Networks.

- Med dei tradisjonelle TV-tala og digitalsjåinga til saman, har vi aldri hatt høgare sjåartal på eit enkelt TV-program nokon gong enn vi har på damestafetten og skiskytinga.

Søndag blei det også sett ny rekord for kor mange som følgde Discoverys kanalar gjennom ein heil dag. Kanalane hadde ein sjåarandel på 56,5 prosent på søndag. Blant sjåarane under 50 år hadde TV-gruppa 61,1 prosent.

(©NPK)

Johannes Høsflot Klæbo (t.v.), Martin Johnsrud Sundby, Astrid Uhrenholdt Jacobsen, Didrik Tønseth, Ragnhild Haga og Marit Bjørgen, Simen Hegstad Krüger (t.v. framme) og Ingvild Flugstad Østberg tok gullmedaljen til Norge på 4x10 kilometer stafett for herrar og 4x5 kilometer stafett for kvinner i Alpensia Cross-Country Skiing Centre under vinter-OL i Pyeongchang. Foto: Lise Åserud / NTB scanpix