Palma vil forby utleigebustader til turistar 

Palma på Mallorca ser ut til å bli den første byen i Spania der det er forbode å leige ut leilegheiter til turistar.

Ordførar i Palma Antoni Noguera seier at han og resten av byrådet støtter forslaget fordi «det ikkje finst noko verre enn at innbyggjarar ikkje kan bu i heimbyen sin fordi dei ikkje har råd til husleiga».

Leigeprisane har dei siste åra auka både i Palma og i dei fleste andre spanske byar. Mange innbyggjarar og lokalpolitikarar meiner det kjem av nettsider og appar som turistar brukar for å finne privatbustader som dei kan leige på korttidsbasis direkte frå eigarane.

Ifølgje Noguera skal hus haldast utanfor forbodet så framt dei ikkje ligg i verna område, i nærleiken av flyplassar eller i industriområde.

(©NPK)

I Palma på Mallorca har det blitt så dyrt å leige at mange lokale ikkje har råd til å bu i byen. Foto: Berit Keilen / NTB scanpix

Annonse
Annonse