Per Sandberg diskuterte snøkrabbe med russisk kollega

Ei rekke vanskelege fiskerispørsmål kom på bordet under møtet tysdag mellom fiskeriminister Per Sandberg (Frp) og Ilja Sjestakov, som er visejordbruksminister og fiskerisjef i Russland.

Dei to diskuterte blant anna snøkrabbekonflikten mellom Norge og EU, norsk selfangst i russisk sone og dei vedvarande fiskerikonfliktane med Færøyane.

Men tonen mellom dei to var hjarteleg, trass i både alvorleg tematikk og det anstrengde forholdet mellom Russland og Vesten.

- Vi har ein fantastisk god dialog. Forutan sanksjonsdelen. Og Sjestakov er ein fantastisk bra mann også, så det går an å spøke litt med det, seier Sandberg til NTB.

Han seier han fekk stadfesta at Noreg og Russland framleis står saman i snøkrabbesaka.

- For oss var det viktig å ta opp dette, slik at vi kan vere sikre på at vi står skulder ved skulder, seier Sandberg.

Bakteppet for konflikten er at Noreg nektar fartøy frå EU-land å fange snøkrabbe i fiskevernsona utanfor Svalbard. EU meiner Svalbardtraktaten gir dei rett til å fange like mykje snøkrabbe som norske fiskarar i desse sjøområda.

Forhandlingane har stått fast sidan i fjor, og Sandberg ser ingen umiddelbare teikn til gjennombrot.

(©NPK)

Fiskeriminister Per Sandberg saman med visejordbruksminister og fiskerisjef frå Russland, Ilja Sjestakov, under besøket til den store sjømatmessa Seafood Expo i Brussel. Foto: Johan Falnes / NTB scanpix