Peruansk domstol vil stille tidlegare president for retten
Ein domstol i Peru gir ordre om å stille tidlegare president Alberto Fujimori for retten i samband med drapet på seks bønder i 1992.
Domstolen meiner den tidlegare presidenten ikkje har immunitet og at han dermed kan stillast for retten. Han er ein av 22 personar tiltalt for tilknyting til drapa, som skal ha blitt utført av ei paramilitær gruppe.
Reuters siterer ein juridisk talsperson i regjeringa på at Fujimori kan anke rettsavgjerda frå domstolen. Til ein lokal radiokanal seier advokaten til ekspresidenten at ei anke blir vurdert.
Fujimori vart nyleg gitt nåde av sitjande president Pedro pablo Kuczynski i ei anna sak der han sona 25 års fengsel for brot på menneskerettane og korrupsjon. Fujimori var omtrent halvvegs gjennom soninga då han vart gitt nåde.
Nådegjevinga førte blant anna til store demonstrasjonar.
Kuczynski sa at avgjerda var basert på ei medisinsk vurdering om at Fujimori har ein ulækjeleg sjukdom som utviklar seg raskt, og at forholda i fengselet var ein alvorleg risiko for livet hans. Motstandarane meinte derimot at avgjerda var politisk motivert.
Etter nådegjevinga har Kuczynskis popularitet falle på målingane.
(©NPK)
Slektningar av folk som vart drepne av soldatar under Fujimoris regime under ein demonstrasjon i januar. Familiemedlemmene meiner Fujimori bør stillast for retten for drapa. AP Photo/Foto: Martin Mejia / AP / NTB scanpix.
