Polen fall for eige grep mot Senegal
Eit uheldig sjølvmål av ein polsk spelar og eit salig rot mellom tre andre gav Senegal 2-1-siger over Polen i fotball-VM tysdag. Polen fall på eige grep.
Thiago Cionek blei bokført med eit sjølvmål då han var uheldig og endra retning på eit skot i slutten av første omgang. Grzegorz Krychowiak, Jan Bednarek og Wojciech Szczesny bydde saman på 2-0-målet som blei sett inn av frontfiguren i kampen M'Baye Niang.
Krychowiak skapte spenning med reduseringa si i 86. minutt, men det var ikkje nok.
Senegal er med i VM for første gong sidan laget i debuten i 2002 slo ut Lars Lagerbäcks Sverige på golden goal i åttedelsfinalen og tapte på golden goal for Tyrkia i kvartfinalen. No held jakta fram på å bli Afrikas første semifinalist.
Begge laga hadde overbevist mest defensivt og heldt dei dyktige angrepsspelarane til motstandaren unna ein einaste målsjanse inntil Senegal tok leiinga i det 38. minutt med eit mål som smakte litt av vilje og opportunisme, men mest av tilfelle og flaks.
Niang brukte både musklar og vilje då han vann ein luftduell med Lukasz Piszczek, som blei liggjande att på graset mens Senegal-spissen sette fart. Så starta Niang ei klassisk opprulling mot høgre ved å spela innpå til Sadio Mané, som på nytt spelte vidare til Idrissa Gueye.
Sistnemnde såg snittet sitt til å fyra laus frå 18 meter, hardt pressa av eit par motspelarar. Skotet hadde retning rett mot keeper Szczesny, som stod klar til å fanga ballen, men inne i feltet trefte han leggen til Cionek, endra heilt retning og sette målvakta sjakk matt.
Juventus-keeperen måtte berre stå og sjå han trilla langsamt i mål. Cionek, som erstatta den skadde nøkkelmannen Kamil Glik, blei bokført med det fjerde sjølvmålet i VM.
Lewandowski-raid
Senegal kunne dobla leiinga rett før pause, men Salif Sané nikka svakt i bakken og over då han fekk stå heilt åleine framfor mål på eit hjørnespark.
Den polske landslagssjefen Adam Nawalka gjorde grep i pausen. Han bytte ut 100-kampjubilant Jakub Blaszczykowski, som hadde ein dårleg dag, sette inn Jan Bednarek og endra formasjon.
Det var Robert Lewandowski som først viste seg fram, omsider. Han vann ballen ved midtstreken, sette fart forbi eit par motspelarar og blei felt av Sané rett utanfor 16-meteren. Hadde ikkje ein lagkamerat kome seg på rett side med eit kraftløp, ville det blitt raudt kort og ikkje berre gult.
Lewandowski skrudde frisparket over muren, men keeper Khadim N'Diaye fekk begge hendene på ballen og slo han ut.
Nokre minutt seinare trefte Lukasz Piszczek dårleg på volley frå flott posisjon etter raid og innlegg frå venstreback Maciej Rybus, men så øydela Polen for seg sjølv igjen.
Vinka inn til scoring
M'Baye Niang stod utanfor banen og fekk behandling, og Senegal venta med eit annonsert byte til situasjonen hans var avklart. Akkurat då Niang blei vinka inn att valde Krychowiak å spela ballen bakover mot eigen halvdel for å halda han unna motspelarane. Han såg ikkje Niang, som starta som ein rakett inn frå sidelinja.
Torino-spelaren kom mellom Bednarek og Szczesny, som begge var like rådville i jakta si på ballen, og kunne spasera 2-0 i ope mål.
Dei polske spelarane protesterte til inga nytte mot at dommarane lèt Niang springa inn på banen frå ein posisjon nokre meter inne på polsk halvdel. Ved midtstreken stod nemleg Cheikh N'Doye og venta på å bli bytt inn.
Polen jaga målet som ville gjort kampen spennande igjen og fekk han då Krychowiak nikka inn eit frispark frå Kamil Grosicki, men Senegal heldt tett i attverande minutt og fire tilleggsminutt.
(©NPK)
M'Baye Niang kjem rett frå sidelinja og tek med seg ballen mellom Jan Bednarek og keeper Wojciech Szczesny på veg mot vinnarmålet til Senegal i VM-kampen mot Polen. Foto: Themba Hadebe, AP / NTB scanpix
