Politiets avgjerd etter Turøy-ulykka kjem før oktober
Politiet vil avgjere om nokon skal stillast til ansvar for Turøy-ulykka seinast i september, melder TV 2. 13 personar omkom i helikopterstyrten.
Tidlegare denne månaden kom Havarikommisjonen med den endelege rapporten for Turøy-ulykka. Her blei det retta sterk kritikk både mot helikopterprodusenten Airbus og Det europeiske flytryggingsbyrået (EASA).
Tolv menn og éi kvinne omkom då eit Super Puma-helikopter styrta etter at rotoren losna ved Turøy nordvest for Sotra i Hordaland 29. april 2016.
Politiet har venta på rapporten frå Havarikommisjonen, og dei vil no sjå på den før dei tar ei avgjerd om nokon skal stillast til ansvar.
- Vi må sjå om den endelege rapporten utløyser behov for ytterlegare etterforsking eller om vi stoppar etterforskinga her, seier politiadvokat og påtaleansvarleg Trygve Ritland ved Vest politidistrikt til TV 2.
- No har hovudetterforskar i saka ferie, men vi tek ei endeleg avgjerd seinast i september, legg han til.
(©NPK)
13 menneske mista livet då rotoren losna på eit Super Puma-helikopter i april 2016. Foto: Torstein Bøe / NTB scanpix