Pressa Viking slo tilbake etter fire strake tap

Viking var i trøbbel heime mot bortesvake Florø, men snudde til 2-1-siger og tre etterlengta poeng.

Det er krise i Stavanger etter at Viking har gått på smell etter smell i 1. divisjon. Vegen tilbake til Eliteserien har blitt litt meir kronglete enn mange såg for seg. I tur og orden har Viking tapt mot Aalesund, Jerv, Sogndal og Nest-Sotra.

Trenar Bjarne Berntsen slo i bordet etter 0-5-tapet mot Nest-Sotra, og han fekk eit løft i hengekampen onsdag.

Det var rett nok gjestene frå Florø som tok leiinga etter at kvarteret var spelt. Med ei flott avslutning frå 16-meterstreken sende Peter Aase bortelaget fremst.

Veteranen Tommy Høiland sørgde for litt arbeidsro då han scora på straffespark rett før pause. Fredrik Torsteinbø sikra tre poeng til eit pressa Viking då Florø aldri fekk klarert ein corner etter at timen var spilt.

Florø gav ikkje opp, og tre minutt før slutt var gjestene berre eit stolpetreff unna poeng. Forsøket til Christer Husas gjekk via Claes Kronberg og i stolpen til heimesupporterane si store lette.

Viking ligg på fjerdeplass med 22 poeng, tre færre enn Sogndal på andreplassen som gjev direkte opprykk. Leiarlaget Aalesund, som rykte ned frå Eliteserien saman med Viking i fjor haust, toppar 1. divisjon med 29 poeng.

Florø, som står utan bortesiger denne sesongen, ligg nest sist med 11 poeng. Berre Strømmen (10) har teke færre poeng.

(©NPK)

Tommy Høiland scora på straffespark då Viking vann over Florø. Foto: Carina Johansen / NTB scanpix

Annonse
Annonse