Raud veke på børsen - fredagen svakt i pluss

Ei stigning i hovudindeksen på 0,22 prosent til 889,88 poeng fredag forhindra ikkje eit markant fall i indeksen veka sett under eitt.

Fasit då børsen stengde for handel fredag ettermiddag var at veka totalt sett gjekk 0,9 prosent i minus, blant anna som følgje av eit markant fall onsdag etter overraskande høge oljelagertal frå USA. Indeksen steig noko torsdag og fredag, men ikkje nok til å snu utviklinga.

Fredag enda hovudindeksen opp 0,2 prosent etter ny oppgang i oljeprisane. Nordsjøolja gjekk for snautt 72 dollar fatet på spotmarknaden fredag ettermiddag, mens amerikansk lettolje styrkte seg tilsvarande til snautt 66 dollar fatet.

Blant dei mest omsette aksjane var oljeselskapet DNO på tredjeplass. Selskapet var også nest høgst på taparlista, med eit kursfall på 6,8 prosent. DNO har hatt ei formidabel verdiutvikling på 82 prosent i år. Fredag var aksjen omsett heile 10.726 gonger for ein samla verdi av 301 millionar kroner.

Equinor (+0,6 prosent) var som vanleg det mest omsette selskapet å børsen, med Hydro på andreplass etter at kursfall på heile 2,6 prosent.

Veidekke blei fredagens vinnar, med ei verdistigning på 7,8 prosent, mens John Fredriksen selskap Frontline og Golden Ocean avslutta veka som andre- og tredjeplass etter verdistigning på høvesvis 7,6 og 4,7 prosent.

Ute i Europa var stemninga svakt negativ. I Frankfurt fall DAX 30-indeksen med 0,2 prosent, mens CAC 40 i Paris svekte seg 0,1 prosent. FTSE 100 i London gjekk i null.

(©NPK)

Illustrasjonsfoto: Tor Erik Schrøder / NTB scanpix

Annonse
Annonse