Rekordstor hjortejakt i jaktåret 2017/2018
I alt 42.500 hjort blei felt denne jaktsesongen. Dermed passerte hjortejakta fellingsrekorden frå elgjakta i 1999.
Rekorden frå 1999 var på 39.400 elg, viser ferske tal frå Statistisk sentralbyrå (SSB).
I 2017/2018-sesongen blei det felt 31.613 elg og 42.541 hjort, viser SSB-tala. Utbyttet frå elgjakta auka med 780 dyr frå førre jaktår, mens utbyttet frå hjortejakta auka med heile 4.800 dyr.
Kvotane var på 57.200 hjort og 39.900 elg og fellingsprosenten enda på høvesvis 74 og 79 prosent.
Flest hjort, heile 12.850 dyr, blei skotne i Sogn og Fjordane, mens Nord-Trøndelag var fylket med største elgjakt for andre år på rad. Der blei 5.600 dyr felt.
Etter tusenårsskiftet har utbyttet frå elgjakta gradvis falle i mange av dei viktige områda. I same periode har utbyttet frå hjortejakt halde fram å stige og talet på skotne dyr passerte talet på skotne elg i jaktsesongen 2008/2009.
(©NPK)
Foto: Paul Kleiven / NTB scanpix
