Sandberg i tvil om permanent justisministerpost

Per Sandberg (Frp) blei denne veka utnemnt som mellombels justisminister, men han er usikker på om han ønskjer ministerposten permanent på grunn av fortida si.

Fiskeriminister Sandberg har inntil vidare overtatt som justis-, beredskaps- og innvandringsminister etter at Sylvi Listhaug trekte seg tysdag denne veka.

Utnemninga er mellombels, men Sandberg skal vere ønskt som fast justisminister.

Sjølv er han i tvil om han ønskjer å ha ministerposten på permanent basis og seier han er redd fortida hans som tidlegare straffedømt vil skape trøbbel for statsminister Erna Solberg.

- Det er samansett. Folk tilgir, men gløymer ikkje. Eg kan ikkje stå og sjå på at statsministeren må stå og svare på spørsmål om mine utsegn og mine handlingar for 20 år sidan, seier Sandberg til Adresseavisen.

Frp-politikaren er tidlegare straffedømt fordi han i 1997 skalla ned ein asylsøkar på ein privat fest. Sandberg blei pålagt ei bot på 3.000 kroner.

(©NPK)