Sjølvskadarar og suicidale blir lagt i belte og låst inne på glattcelle

I nesten fire av ti tilfelle der innsette låsast inne på glattcelle i fengsel, er sjølvskading, sjølvmordsforsøk eller dårleg psykisk helse grunngjevinga. Det viser ei kartlegging Bergens Tidende har gjort av tvangsvedtak om glattcelle og belteseng ved 23 fengsel i 2016 og 2017.

Nokre innsette blir låst inne på glattcelle fordi dei risper seg med barberblad i underlivet eller prøver å henge seg i sin eigen BH, skriv avisa.

- I mange tilfelle har vi ikkje andre middel for å hindre at folk tek livet sitt, enn å låse dei inne eller leggje dei i belte, seier Tanja Rosså Ødegård, fengselsleiar i Stavanger fengsel.

Fem av dei store fengsla stod for halvparten av alle tilfella av slik tvangsbruk.

Noregs nasjonale institusjon for menneskerettar (NIM) er oppnemnd av Stortinget for å sjå til at Noreg følgjer menneskerettane. Organisasjonen krev at Justisdepartementet gjennomfører ein fullstendig gjennomgang av tvangsbruk og helsehjelp i fengsla.

- Dette er svært alvorlege funn. Det skjer systematisk og i stort omfang. Derfor går vi ut frå at det skjer klare brot på Grunnlovas forbod mot umenneskeleg eller nedverdigande behandling, seier Kristian Haugland Nilsen, jurist og seniorrådgjevar hos NIM.

Justisminister Tor Mikkel Wara (Frp) skriv i ein e-post til BT at han tek kritikken på alvor:

- Vi vil gjennomgå kritikken og vurdere kva for tiltak det er grunnlag for, skriv han.

(©NPK)

Den stortingsoppnemnde organisasjonen Noregs nasjonale institusjon for menneskerettar krev at justisminister Tor Mikkel Wara stoppar det organisasjonen meiner er menneskerettsbrot i norske fengsel. Foto: Lise Åserud / NTB scanpix