Slovenias nye statsminister godkjend av dei folkevalde
Slovenias nye statsminister Marjan Sarec kan danne regjering etter å ha blitt godkjend av nasjonalforsamlinga.
Avstemminga fredag enda med at Sarec blei godkjend med 55 mot 31 stemmer. Vedtaket blei gjort etter fleire veker med politisk usikkerheit.
Sarec er tidlegare komikar og høyrer til det moderate venstreorienterte partiet LMS. Regjeringa hans kjem til å bestå av til saman fem parti, som alle høyrer til sentrum og den moderate venstresida. I tillegg får regjeringa parlamentarisk støtte av det meir venstreorienterte partiet Levica.
Valet i juni enda med at det høgreorienterte og innvandringskritiske partiet SDS blei størst med 25 av dei 90 plassane i nasjonalforsamlinga. Men partiet greidde ikkje å samle nok parlamentarisk støtte til å danne regjering.
(©NPK)
Slovenias nye statsminister Marjan Sarec. Foto: Darko Bandic / AP / NTB scanpix
