Slovensk ishockeyspelar dopingtatt før skjebnekamp mot Noreg
Den slovenske landslagsspelaren Ziga Jeglic har testa positivt for doping før OL-møtet med Noreg tysdag. Han testa positivt etter bruk av ein astmamedisin.
29-åringen gav frå seg positiv prøve på stoffet fenoterol. Middelet er forbode og blir brukt ved astma og andre problem med bronkiane.
Ziglic spelar i KHL for Neftekhimik Nizjnekamsk og har notert seg for éin assist på sine tre kampar i OL.
Jeglic er utestengd frå OL og har fått 24 timar på seg til å forlate OL-landsbyen.
Slovenaren er den tredje dopingsaka under Pyeongchang-leikane. Tidlegare har den japanske kortbaneløparen Kei Saito og den russiske curlingspelaren Alexander Krusjelnitskij gitt frå seg positive dopingprøvar.
Ziga Jeglic må forlate OL-byen etter positiv dopingprøve. Foto: Frank Franklin / AP / NTB scanpix