Sparebank 1 og DNB vil slå saman forsikringsverksemdene
Sparebank 1 Gruppen og DNB inngjekk onsdag ein intensjonsavtale om å slå saman forsikringsverksemdene sine. Med det kan dei bli blant dei største i landet.
Samanslåinga vil skje ved at DNB Forsikring AS fusjonerer med Sparebank 1 Skadeforsikring AS. Det blir vurdert om enkelte personrisikoforsikringar skal overførast til det nye selskapet. Planen er at det fusjonerte selskapet vil ha ein tilnærma komplett produktportefølje innanfor risikoforsikring til privat- og SMB-marknaden, heiter det i ei melding frå Sparebank 1.
- Bransjetal viser at selskap med bankdistribusjon tek marknadsdelar og har god lønsemd. Saman med DNB vil Sparebank 1 no styrkja distribusjonen av forsikring gjennom bankane. Samtidig vil vi få større kraft til å vidareutvikla innovative og kundevennlege løysingar, og koma endå raskare på banen med nye produkt til kundane, seier Turid Grotmoll, konsernsjef i Sparebank 1 Gruppen.
- Skadeforsikring er viktig for kundane våre. Sparebank 1 har vore flinke i denne marknaden, og vi ser fram til å samarbeida om å byggja ein stor aktør som både kan laga dei beste kundeopplevingane og gode resultat, seier Rune Bjerke, konsernsjef i DNB.
Sparebank 1 Gruppen AS skal ha ein eigardel på 60 prosent og DNB 40 prosent i det nye selskapet. Selskapet vil framleis vera eit dotterselskap i Sparebank 1 Gruppen AS.
Det nye selskapet vil ved fusjonstidspunktet ha ein marknadsdel innanfor risikoforsikring på over 15 prosent og blir med dette det tredje største forsikringsselskapet i landet.
Fusjonen vil etter planen gjennomførast 1. januar 2019, under føresetnad av godkjenning frå styresmaktene.
(©NPK)
