Stavanger kommune svindla for 500.000 kroner
Stavanger kommune har ved ein feil betalt ein halv million kroner til nettsvindlarar. Svindlarane blei avslørt då dei prøvde å få same sum ein gong til.
18. mai fekk kommunen ein falsk e-post frå nokon som utgav seg for å vere dagleg leiar i det kommunale føretaket Stavanger Utvikling KF. Kommunen blei beden om å betale 49.500 euro til kursverksemd, melder NRK.
Beløpet er om lag 500.000 kroner.
Kommunen skriv i ei pressemelding at pengane blei betalt ut som følgje av rutinesvikt.
- Det er vanskeleg å seie akkurat kor ofte det skjer, men det er blitt såpass vanleg at viss du jobbar med å behandle fakturaer, må du vere bevisst på problemet, seier direktør Torgeir Waterhouse i IKT-Noreg.
- Taktikken til svindlarane er å bombardere ulike e-postadresser heilt til nokon glepper. Derfor er gode rutinar heilt avgjerande, og ein er nøydd til å ta høgd for at folk gjer feil, fortset Waterhouse.
Stavanger kommune vil melde svindelsaka til politiet og oppmodar andre til å vere på vakt.
(©NPK)
Illustrasjonsfoto: Berit Roald / NTB scanpix