Svak opptur for Oslo Børs
Etter ein børsdag med fleire svingingar gjekk torsdag hovudindeksen på Oslo Børs til slutt opp med 0,2 prosent og enda på 875,7 poeng.
Dermed hadde Oslo Børs oppgang for tredje dag på rad denne veka.
Den rekka bidrog blant andre Equinor til, då aksjen torsdag steg 1,0 prosent. Yara International, som tysdag og onsdag gjekk opp med høvesvis 4,5 og 3,6 prosent, fortsette oppgangen med 0,5 prosent. Petroleum Geo-Services gjekk på si side opp 1,8 prosent.
Blant dei ti øvste på omsetningstoppen var det derimot fleire som hadde nedgang. DNB, Telenor og Norsk Hydro gjekk ned med høvesvis 0,5, 0,6 og 1,4 prosent.
Dei leiande europeiske børsane hadde ein forsiktig børsdag. DAX 30 i Frankfurt gjekk ned 0,7 prosent, mens CAC 40 i Paris gjekk ned med 0,6 prosent. FTSE 100 i London gjekk opp, men berre med beskjedne 0,1 prosent.
Nordsjøolja blei torsdag ettermiddag omsett for 73,11 dollar fatet, ein oppgang på 0,1 prosent frå natta. Amerikansk lettolje blei omsett for 69,50 dollar fatet, ein oppgang på 0,6 prosent.
(©NPK)
Oslo Børs. Illustrasjonsfoto: Tor Erik Schrøder / NTB scanpix
