Svensk Vålerenga-toppscorar blir norsk landslagsspelar

Den svenske toppscoraren til Vålerenga i eliteserien i ishockey, Tobias Lindström, er ein del av den norske landslagsstroppen som skal samlast måndag.

Det stadfestar Norges Ishockeyforbund (NIH) til TV 2.

Vålerenga-spelaren blei toppscorar for Oslo-klubben med 28 mål i grunnspelet i eliteserien. 29-åringen leverte søknaden om endra statsborgarskap i januar. Landslagsspel var ein av faktorane som motiverte han.

- Det spelar ein stor rolle, men det er ikkje berre derfor. Eg trivst veldig godt her, har basen min her og ein lang kontrakt, seier Lindström til TV 2.

- Tobias ytra sjølv ønske om å bli norsk, og starta prosessen på eige initiativ i haust. Søknadsprosessen starta i januar, og vi begynte å involvere oss først for halvanna veke sidan, opplyser organisasjonssekretær i NIH, Kristoffer Holm, til kanalen.

Lindström er avhengig av å få godkjent søknaden sin om statsborgarskap før VM opnar i starten av mai dersom han skal spele for Noreg i Danmark.

(©NPK)

Tobias Lindström på Vålerenga vil bli norsk landslagsspelar. Foto: Jon Olav Nesvold / NTB scanpix

Annonse
Annonse